“Төв Азийн уран” компанийн Дорнодод ураны хайгуул хийх лицензийг Цөмийн энергийн газраас цуцалсан. Гэвч Нийслэлийн захиргааны хэргийн шүүх үүнийг хууль бус хэмээн үзэж шийдвэрийг хүчингүй болгосон билээ. Эл шийдвэрт Цөмийн энергийн газрынхан ихэд бухимдаж буй бөгөөд Захиргааны хэргийн шүүхийн шийдвэрийг хүлээн зөвшөөрөхгүй, давж заалдах болно гэж байна.

Энэ тухай тус газрын Цөмийн материалын хэлтсийн дарга Т.Баярбаясгалан “Цөмийн энергийн газраас гаргасан “Төв Азийн уран” компанийн лицензийг хүчингүй болгосон манай захирамжид үг үсгийн алдаа гарч, бидний талаас хариуцлагагүй хандсан тал бий. Түүнээс хууль эрхзүйн хүрээнд буруу гаргасан шийдвэр биш. Тиймээс давж заалдах болно” хэмээж мэдэгдлээ.

Хэрэв давж заалдах шатны шүүхээс “Төв Азийн уран” компанийн талд шийдвэр гаргавал тус компани холбогдох зөрчлөө арилгаж байж Цөмийн энергийн газраас лицензийн эрхээ авах боломжтой юм байна. Харин Цөмийн энергийн газрын талд асуудал шийдэгдвэл “Төв Азийн уран” лицензээ буцаан авах ямар ч боломжгүй болох ажээ.

Т.Амур
Өдрийн шуудан