“Оюутолгой” ХХК өчигдөр 1,2 тэрбум ам.долларын өртөг бүхий зэс, алтны баяжуулах үйлдвэрийн барилгын ажлаа эхлэхээ зарлаж, бүтээн байгуулалтын ажилдаа шуударч буйгаа дэлхий нийтэд мэдээлэв. Энэхүү баяжуулах үйлдвэр нь Оюутолгой ордоос олборлосон хүдрийг шат дамжлага бүрээрээ боловсруулж, хэрэглэгчдэд эцсийн бүтээгдэхүүн нийлүүлэх боломж олгох аж. Мөн хөрөнгө оруулагчид нь үйлдвэрийн хүчин чадлыг нэг тонн хүдрээс 500 кг орчим зэс ялган авна гэдгээр хэмжиж буй бөгөөд 2013 онд ашиглалтад оруулна. Энэ хугацаанд 3000 хүнийг ажлын байраар хангах бол ашиглалтад орсноор өдөрт 100 мянган тонн хүдэр боловсруулж, жилд 450 мянган тонн баяжмал үйлдвэрлэхээр тооцсон байна.

Уг ордын хөрөнгө оруулалт болон бүтээн байгуулалтыг хариуцаж, Монголын Засгийн газартай Хөрөнгө уулалтын гэрээ байгуулсан “Айвенхоу майнз” болоод “Рио Тинто”-гийн дунд хувьцаанаас үүдсэн маргаан дэгдээд байгаа. Энэ үед баяжуулах үйлдвэрийн нээлт болж буй нь манай талд ямар ч тохиолдолд Оюутолгойг ашиглах нь гэдэг бага ч болтугай итгэл төрүүлэв. Түүнчлэн “Айвенхоу майнз” компани “Рио тинто”-гийн дэмжлэгээс үл хамааран дэлхийн хүчирхэг санхүүгийн группүүдээс хоёр тэрбум ам.долларын зээл авахаар тохиролцсон нь барилгын ажлыг эрчимжүүлэх нэг үндэс байж болох юм.

Улс төрийн тойм