Үүнээс 3800-4000 га-д нөхөн сэргээлт хийж, 10 орчим мянган га-д нөхөн сэргээлт хийгээгүй аж. Ялангуяа үүнд Дорноговь, Хэнтий аймагт ажилладаг ашигт малтмалын компаниуд багтжээ. Ер нь ашигт малтмал олборлолт, хайгуулын чиглэлээр үйл ажиллагаа эрхэлдэг компаниуд ашигласан газартаа нөхөн сэргээлт хийдгээсээ хийхгүй нь олон.

Жилээс жилд нөхөн сэргээлтийн нүд хуурсан тайлан гаргаж, өч төчнөөн сая төгрөг зарцуулсан гэсэн тооцоо барин эрхээ сунгуулахаар ирдэг компаниуд дийлэнх нь. Нөгөөтэйгүүр нөхөн сэргээлт хийсэн гэх газар нь ч хууль бус гар аргаар алт олборлогчдын өмч болдог. Тэд сул орхисон газарт дахин хайгуул хийж, тэртэй тэргүй сэндийчүүлж сэргэх чадвараа алдсан хэвлийг нь дахин маажиж эмтэлдэг.

Манайхаас бусад улс оронд хүний эрүүл мэнд, байгаль орчин үнэ цэнэтэй, халдаж болшгүй. Гэтэл манайх тийм биш. Харин ч манай хууль ийм үйлдэл гаргасан хэн бугайд ч уян зөөлөн. Нялцгай ч гэж хэлж болохоор. Иймээс уул уурхайн компанийнхан дураараа дургих нь аргагүй. Өнгөрсөн хугацаанд тэдэнд ял ногдуулсан тохиолдол үгүй. Цөөн тохиолдолд нөхөн сэргээлт хийтэл үйл ажиллагааг нь зогсоох, торгох эсвэл нөхөн сэргээгээрэй хэмээн хийх ёстой зүйлийг нь хийлгэх шийтгэл ноогдуулдаг.
Энэ бол хулгайчийг барьсан атлаа хулгайлсан зүйлийг нь хурааж авалгүй, дээрээс нь шийтгэлгүй явуулсантай агаар нэг. Гэтэл байгаль орчин сүйрсээр л. Иймээс баялгийг нь ашиглаж мөнгө олчихоод сэндийчсэн газраа тэр чигт нь орхидог хариуцлагагүй компаниудад хатуу арга хэмжээ авах цаг болжээ. Хамгийн гол нь ниргэсэн хойно нь хашгирах биш түүнээс урьтаж хариуцлагыг чангатгах тогтолцоо энэ салбарт үгүйлэгдэж байна.

Ж.Сүрэн
Үнэн