Монгол Улс нүүрсний асар их нөөцтэй. Таван толгой орд газраасаа Хятад руу төмөр замын салангад салаа тавихаас татгалзаж байгаа бөгөөд улсынхаа төмөр замын нэгдсэн сүлжээ рүүгээ уг салааг холбох бодолтой байгаа нь экспортоо, тухайлбал, Оростой өргөжүүлэх боломж олгох юм. Монголын Зам тээвэр, барилга, хот байгуулалтын сайд Халтмаагийн Баттулгын хийсэн мэдэгдлийг иш татан Блумберг агентлаг лхагва гарагт ингэж мэдээлжээ.
Хятадтай залгаа хилээс 200 км зайтай орших Таван толгой орд газар нь дэлхийд томоохонд тооцогддог бөгөөд 6,5 тэрбум тонн нүүрстэй. Тэр дундаа өндөр илчтэй коксжсон нүүрс 40 орчим хувийг, эзэлдэг байна. Монголын Засгийн газар эхлээд нүүрсээ экспортлохын тулд Хятад руу төмөр замын салангад салаа тавих бодолтой байсан юм.
Харин одоо, Блумберг агентлагийн мэдээлснээр, уг хувилбарыг эргэн авч үзэж, илүү урт зам тавихаар болжээ. Ингэснээр орд газраас гарсан зам Монголын төмөр замын нэгдсэн сүлжээнд холбогдох юм.
Таван толгойн нүүрсийг зөвхөн Хятадад төдийгүй, Орос, Япон, Өмнөд Солонгост экспортлох нь зүйтэй гэж Сангийн яамны Тээврийн хэлтсийн дарга Дашбалжирын Нэмэхбаяр хэлснийг Блумберг агентлаг иш татсан байна. “Ийм учраас салаа замыг Оросын төмөр замын сүлжээтэй холбох нь дээр” гэж Монголын мэргэжилтэн цохон тэмдэглэжээ.
З.Амгалан
МОНЦАМЭ