Уурхайн гүнд дарагдан cap гаруй болж буй Чилийн уурхайчлыг аврах ажиллагаа төдийлөн үр дүнтэй биш байгаа. Газар доор 700 метрийн гүнд байгаа тэднийг аврахад гарцын нөгөө талаас хонгил ухах нь хамгийн зөв, аюулгүй арга гэж буй ч ингэхийн тулд гурваас дөрвөн сарын хугацаа шаардлагатай гэсэн. Энэ нь газар доор хүчилтөрөгч болон хоол, шингэнээр дутагдаж байгаа тэдний хувьд тэсч, амьд үлдэхэд хэтэрхий урт хугацаа гэдгийг хэн бүхэн мэдэж буй.

Тэгвэл түүнээс өөр аргаар, өөрөөр хэлбэл гарах гарцыг өргөсгөж ухсанаар хоёрхон сарын дотор уурхайчдыг гаргаж чадна хэмээн инженерүүд хэлж буй гэнэ. Гэсэн ч “Б” хэмээх эл төлөвлөгөөг тус улсын Уул уурхайн яам төдийлөн сайшаахгүй байгаа бөгөөд урьдчилан тааварлахын аргагүй алхам хэмээн үзэж буй аж.

Чилийн ГеоТех хэмээх компани Scram Т-130 хэмээх өрөмдлөгийн машиныг авчирч буй. Усны цооног гаргахад ашигладаг уг машин таваас зургаан өдрийн дараа ирэхэд ажиллагааг эхлүүлнэ хэмээн төлөвлөөд байгаа гэнэ.
Өнгөрсөн пүрэв гаригт уурхайчид гэр бүлийнхэндээ зориулж, бичлэг хийснээ илгээсэн бөгөөд тэдний хийсэн бичлэгийг Чилийн телевизээр дамжуулсан байна. Мөн үүнээс гадна тэдний заримынх нь гэр бүлийнхэн Засгийн газар болон уурхайн эзэмшигчийн эсрэг гомдол мэдүүлж, хуулийн хариуцлага хүлээлгэхийг хүсч буйгаа мэдэгдээд байгаа юм.

Өдрийн шуудан