Казакстаны Ерөнхийлөгч Нурсултан Назарбаев ирэх сарын 14-15-нд Украйн улсад айлчилж, хоёр орны байгалийн хийн худалдаа, нийлүүлэлтийн асуудлыг нэг мөр болгохоор болжээ.

Украйн улс Казакстанаас хийн түлш импортлох тухай нэлээд удаан ярьж байгаа боловч одоог хүртэл бүрэн шийдвэрлээгүй байгаа аж. Үүнд ОХУ-ын ашиг сонирхлын нөлөөлөл их байгаа гэж олон улсын шинжээчид үзэж байна. Учир нь Орос, Украйн улсын хооронд байгуулсан хамтын гэрээ, улс төрийн харилцааны амлалт зэрэг нь дахин шинэ төсөл хэрэгжүүлэхэд саад болж болзошгүй байгаа юм.

Хэрвээ энэ хэлэлцээр амжилттай болж чадвал энэ салбарт дангаар ноёлдог ОХУ-ын байр суурь сулрах магадлалтай ажээ. Өнгөрсөн гуравдугаар сард Киевт болсон уулзалтын үеэр Украйны Ерөнхий сайд Маякола Азаров казакаас байгалийн хий авах хүсэлтэй байгаагаа тус улсын Гадаад харилцааны сайд Канат Саудабаевт илэрхийлсэн.

Казакстан улсын Каспийн тэнгистэй хиллэдэг хязгаарт 3.3 тэрбум куб.метр байгалийн хийн нөөц бий гэж тогтоосон бөгөөд, улсын хийн түлшний жилийн хэрэгцээ 45 сая куб.метр гэнэ. Энэ талаар Виктор Янукович, Дмитрий Медведев нар өнгөрсөн дөрөвдүгээр сард Украйны Караков хотод хэлэлцэж, Украйн Оросоос 2020 он хүртэл мянган куб.метр хийг 330 ам.доллароор худалдан авах гэрээ байгуулсан байна.

Харин Украйны монополь гэгддэг “Газпром”-ын Ерөнхий захирал Алексей Миллер энэхүү ханшийг мянган куб. метр тутамд 60 ам.доллар болгож бууруулахыг шаардаж байгаа юм.

Г.Амартүвшин
Өдрийн шуудан